Hydref 2025

Ymunwch â ni: Digwyddiad lansio gwasanaethau rhad ac am ddim newydd Cymru Iach ar Waith (12 Tachwedd, Caerdydd)

Rydym yn lansio pennod newydd gyffrous yn Cymru Iach ar Waith – ac mae gwahoddiad i chi fod yn rhan ohoni!

Ymunwch â ni i ddysgu am ein gwasanaethau ac adnoddau newydd am ddim, sydd wedi’u cynllunio i helpu busnesau ledled Cymru i wella iechyd, llesiant a chynhyrchiant yn y gweithle.

• Dyddiad: Dydd Mercher 12 Tachwedd 2025
• Amser: 09:30 – 12:45 (cofrestru, rhwydweithio a lluniaeth o 09:00)
• Lleoliad: Iechyd Cyhoeddus Cymru, Capital Quarter 2, CF10 4BZ

Noder: mae lleoedd yn gyfyngedig. Er mwyn caniatáu mynediad teg, gofynnwn yn garedig nad yw mwy na dau gynrychiolydd o bob sefydliad yn cofrestru i ddechrau. Unwaith y bydd y capasiti wedi’i gyrraedd, bydd rhestr wrth gefn yn cael ei hagor ar gyfer ceisiadau ychwanegol.

Cadwch eich lle heddiw!

Edrychwn ymlaen at eich croesawu a gweithio gyda’n gilydd i greu gweithleoedd iachach a hapusach ledled Cymru.

Gweminar yn trafod Anhwylder Diffyg Canolbwyntio a Gorfywiogrwydd (ADHD) yn y Gwaith

Ymunwch â ni am sesiwn ddiddorol ac addysgiadol ar ‘ADHD yn y Gwaith’, sy’n archwilio sut y gall busnesau ledled Cymru hyrwyddo niwroamrywiaeth a chreu gweithleoedd mwy cynhwysol.

Bydd ein siaradwr arbenigol, Aimee Smith, yn trafod:

• Beth yw niwroamrywiaeth ac ADHD a pham maen nhw’n bwysig yn y gwaith
• Sut i adnabod a defnyddio cryfderau talent niwroamrywiol
• Manteision adeiladu gweithlu cynhwysol

Bydd Rhian Gleed, Cynghorydd Iechyd yn y Gweithle ar gyfer Cymru Iach ar Waith, yn ymuno ag Aimee, a fydd yn rhannu enghreifftiau ymarferol o sut y gall cyflogwyr gefnogi gweithwyr niwroamrywiol.

• Dyddiad: Dydd Gwener, 21 Tachwedd 2025
• Amser: 10:00 – 11:00
• Lleoliad: Ar-lein (rhoddir y ddolen ar adeg cofrestru)

Sicrhewch eich lle nawr!

Rydym yn edrych ymlaen at eich croesawu.

Sut mae Gofal Cymdeithasol Cymru yn cefnogi menopos yn y gwaith

Mae Gofal Cymdeithasol Cymru wedi creu dull cefnogol ac agored o ymdrin â menopos yn y gwaith. Gan fod y rhan fwyaf o’i staff yn fenywod, llawer ohonynt dros 40 oed, roedd y sefydliad yn cydnabod pwysigrwydd darparu gwybodaeth glir, cymorth ymarferol a mannau diogel i siarad.

Drwy bolisi menopos pwrpasol, adnoddau staff a grŵp cefnogaeth gan gymheiriaid, mae’r sefydliad yn helpu cydweithwyr i deimlo’n fwy hyderus a chysylltiedig a theimlo eu bod yn cael eu deall yn ystod y cyfnod hwn o fywyd.

Cymerwch olwg ar dudalennau gwe Cymru Iach ar Waith am ragor o syniadau ar gymorth menopos yn y gwaith.

A oes gennych chi enghraifft o iechyd a llesiant yn y gweithle ar waith?

Cymerwch olwg ar straeon llwyddiant eraill ar ein gwefan, dywedwch eich stori wrthym ac ysbrydolwch gyflogwyr eraill ledled Cymru!

Brechiadau’r gaeaf: Helpu i amddiffyn eich gweithlu a’ch cymuned

Mae Iechyd Cyhoeddus Cymru yn cynnal ymgyrch i dynnu sylw at bwysigrwydd cael y brechlyn ffliw i amddiffyn eich hun, eich gweithwyr a’ch cymuned ehangach rhag salwch difrifol y gaeaf hwn.

Fel cyflogwr yng Nghymru, rydych chi’n chwarae rhan bwysig wrth gadw’ch gweithlu’n iach a helpu i leihau lledaeniad y ffliw. Drwy rannu negeseuon allweddol ac annog staff cymwys i gael eu brechu, gallwch chi helpu i amddiffyn eich tîm, lleihau absenoldeb oherwydd salwch a chefnogi iechyd y cyhoedd ledled Cymru.

Gyda’n gilydd, gallwn helpu i gadw Cymru’n iach y gaeaf hwn.

Am ragor o wybodaeth am sut y gall cyflogwyr hyrwyddo a chefnogi mynediad at y gwasanaethau hyn er budd iechyd gweithwyr, ewch i’r dudalen sgrinio a brechiadau Cymru Iach ar Waith.

Adeiladu partneriaethau i wella cysylltiadau yn y gweithle

Darllenwch flog diweddaraf ACAS (Saesneg yn unig) i ddarganfod sut y gall meithrin partneriaethau cryf rhwng cyflogwyr, gweithwyr a chynrychiolwyr wella cysylltiadau yn y gweithle a chreu amgylchedd gwaith mwy cadarnhaol.

I archwilio ffyrdd ymarferol o feithrin cydweithio yn y gwaith ymhellach, ewch i dudalen we ‘Cyfathrebu yn y Gweithle‘ Cymru Iach ar Waith i ddysgu sut y gall cyfathrebu effeithiol hybu morâl, ymddiriedaeth a chynhyrchiant ar draws eich gweithlu.

Dyddiadau ymgyrchoedd mis Tachwedd

Dyma rai ymgyrchoedd allweddol y mae’n bosibl y bydd gweithleoedd eisiau cymryd rhan ynddynt ym mis Hydref eleni:

Tashwedd (Movember) – Tachwedd

Tashwedd yw’r amser perffaith i dynnu sylw at iechyd dynion – yn gorfforol ac yn feddyliol – yn eich gweithle. Drwy gymryd rhan, gall cyflogwyr helpu i godi ymwybyddiaeth a chreu diwylliant lle mae’n iawn siarad am lesiant.

Dyma sut y gall cefnogi Tashwedd yn y gwaith wneud gwahaniaeth:

• Yn hybu iechyd meddwl a llesiant cyffredinol ymhlith gweithwyr
• Yn annog dewisiadau ffordd o fyw iachach i ddynion yn eich tîm
• Yn annog sgyrsiau agored, gan adeiladu perthnasoedd cryfach a mwy cefnogol yn y gweithle

Dysgwch sut y gall eich gweithle gymryd rhan ar dudalen ymgyrch Tashwedd/Movember.

Wythnos Siarad am Arian (03 – 07 Tachwedd)

Mae Wythnos Siarad am Arian yn gyfle gwych i gyflogwyr ddechrau sgyrsiau agored am arian a llesiant ariannol. Gall annog trafodaethau ynghylch arian helpu gweithwyr i deimlo eu bod yn cael mwy o gefnogaeth ac yn fwy hyderus wrth reoli eu harian.

Dysgwch sut y gall eich gweithle gymryd rhan yn Wythnos Siarad am Arian.

Wythnos Hunanofal Genedlaethol (17 – 23 Tachwedd)

Mae Wythnos Genedlaethol Hunanofal yn tynnu sylw at bwysigrwydd gofalu am ein hiechyd a’n llesiant. Gall cyflogwyr ddefnyddio’r wythnos hon i hyrwyddo gweithgareddau hunanofal ac atgoffa gweithwyr i gymryd amser ar gyfer eu hiechyd corfforol a meddyliol.

Archwiliwch ein tudalen ymgyrch Wythnos Genedlaethol Hunanofal a dysgwch sut i gymryd rhan.

Diwrnod Rhyngwladol y Dynion (19 Tachwedd)

Mae Diwrnod Rhyngwladol y Dynion yn gyfle i godi ymwybyddiaeth o iechyd corfforol a meddyliol dynion ac i annog sgyrsiau agored a chefnogol yn y gweithle.

Dysgwch ragor ar ein tudalen ymgyrch Diwrnod Rhyngwladol y Dynion.

Gellir gweld gwybodaeth ac adnoddau am ystod o ymgyrchoedd ymwybyddiaeth iechyd a llesiant ar ein gwefan.