Wythnos Ymwybyddiaeth Alcohol

Dysgwch sut y gall cyflogwyr ddefnyddio Wythnos Ymwybyddiaeth Alcohol fel cyfle i siarad gyda gweithwyr am y peryglon o yfed alcohol, a darganfod adnoddau defnyddiol.

Gwerth cefnogi Wythnos Ymwybyddiaeth Alcohol yn y gweithle

Wythnos Ymwybyddiaeth Alcohol yw cyfle’r DU i siarad am beryglon alcohol.

Mae annog sgyrsiau agored am beryglon yfed alcohol yn fuddiol i gyflogwyr a gweithwyr. Mae gweithle sy’n cefnogi’r gweithwyr yn:

• Creu awyrgylch agored o onestrwydd a dealltwriaeth
• Cryfhau perthnasoedd yn y gweithle a gwaith tîm
• Sicrhau bod y gweithwyr yn teimlo eu bod yn cael eu gwerthfawrogi a’u cefnogi
• Lleihau absenoldebau oherwydd alcohol a gormod o straen
• Gwella cynhyrchiant a lleihau risgiau diogelwch

Beth am i’ch gweithle gymryd rhan yn yr Wythnos Ymwybyddiaeth Alcohol?

Fel cyflogwr, gallwch greu awyrgylch/diwylliant o ddealltwriaeth lle mae’r gweithwyr yn teimlo’n gyfforddus yn siarad am alcohol a’i niwed.

Dyma rai camau syml ond effeithiol gallwch eu cymryd er mwyn cefnogi Wythnos Ymwybyddiaeth Alcohol:

Arwain trwy weithredu

Anogwch dimau arwain a rheolwyr i siarad yn agored am alcohol a hyrwyddo amgylchedd cefnogol.

Annog sgyrsiau

Defnyddiwch bosteri, e-byst, diweddariadau mewnrwyd, a chyfarfodydd tîm i godi ymwybyddiaeth.

Crëwch gyfleoedd “Paned a sgwrs” i annog sgyrsiau agored am alcohol a pholisïau perthnasol arall. Gallwch feddwl am gwestiynau trafod posib o flaen llaw.

Creu amgylchedd diogel

Crëwch lefydd i weithwyr siarad am bethau personol. Gall hyn gynnwys:

• Grwpiau cymorth cyfoedion anffurfiol
• Cyfarfodydd lles anffurfiol
• Ardaloedd tawel penodol

Dylech ganiatáu i’r gweithwyr ymgysylltu’n breifat trwy flychau awgrymiadau neu fforymau ar-lein.

Darparu adnoddau

Rhannwch fanylion adnoddau y gall eich gweithwyr eu defnyddio i gael cefnogaeth. Gall hyn gynnwys:

• Llinellau cymorth alcohol
• Gwasanaethau cwnsela
• Apiau lles
• Rhaglen Cymorth i Weithwyr
• Mentrau lles mewnol

Ymwybyddiaeth alcohol yn y gweithle trwy gydol y flwyddyn

Mae yna ffyrdd i hyrwyddo ymwybyddiaeth alcohol yn y gweithle trwy gydol y flwyddyn.

Dyma rai pethau y gallwch chi eu gwneud:

Annog dewisiadau iach

Mae hyrwyddo arferion iach yn gallu annog eich gweithwyr i wneud dewisiadau gwell o ran ffordd o fyw. Gall hyn gynnwys yfed alcohol yn gyfrifol, polisïau dim ysmygu, gwneud ymarfer corff yn rheolaidd, a deiet gytbwys.

Addysgu rheolwyr a gweithwyr

Mae hyfforddi gweithwyr i ddeall niwed alcohol yn helpu i greu ymwybyddiaeth a chefnogaeth. Dylai rheolwyr dderbyn hyfforddiant pellach i adnabod yr arwyddion ac ymateb yn briodol, gan sicrhau bod y gweithwyr yn cael y cymorth y maen nhw ei angen.

Dilynwch ganllawiau cyfreithiol a moesegol

Mae sicrhau bod polisïau’r gweithle yn cydymffurfio â’r gyfraith yn helpu i ddiogelu gweithwyr ac yn lleihau’r risg o gamau cyfreithiol neu gosbau am ddiffyg cymorth.

Gallwch ddarganfod mwy o wybodaeth ar ein tudalen am ymddygiadau caethiwus.

Darganfod mwy

I ddarganfod sut y gall eich gweithle gymryd rhan yn Wythnos Ymwybyddiaeth Alcohol a chael adnoddau y gallwch eu defnyddio, ewch i’r wefan Alcohol change UK (Saesneg yn unig).

I gael diweddariadau am ymgyrchoedd iechyd a lles drwy gydol y flwyddyn, cofrestrwch ar gyfer ein cylchlythyr.

• Ymgyrch