Chwefror 2025
Croeso i E-fwletin Cymru Iach ar Waith (CIW)
Mae ein e-fwletin misol yn rhoi diweddariadau rheolaidd gan y tîm Cymru Iach ar Waith, gan ynnwys newyddion ynghylch iechyd a llesiant yn y gweithle a dolenni i ymgyrchoedd a digwyddiadau sydd ar y ffordd.
Y mis hwn:
- Helpwch i Lunio Dyfodol Cymru Iach ar Wait
- Ymunwch â ni mewn digwyddiad Bwrdd Crwn Iechyd a Llesiant Gweithwyr
- Digwyddiad Straen ac Iechyd Meddwl yn y Gwaith
- Cymru Iach ar Waith ar Daith
- Dyddiadau Allweddol ar gyfer mis Mawrth
Mae croeso i chi rannu ein e-fwletin gyda’ch cydweithwyr neu rwydweithiau, ynghyd â’n manylion cofrestru a rhifynnau blaenorol.
E-fwletin
Helpwch i siapio dyfodol Cymru Iach ar Waith
Cyn hir byddwn yn lansio gwefan newydd, wedi’i dylunio i gefnogi cyflogwyr yn well, i wella iechyd a lles yn y gweithle.
Er mwyn sicrhau bod y wefan a chynlluniau marchnata’r dyfodol yn diwallu eich anghenion, rydym am glywed gennych!
Rydyn ni’n gofyn i gyflogwyr ledled Cymru wneud arolwg byr i rannu sut rydych chi’n cyrchu gwybodaeth am iechyd a llesiant yn y gweithle, pa heriau rydych chi’n eu hwynebu, a sut gallwn ni gefnogi eich busnes orau.
Bydd eich adborth yn helpu i lunio dyfodol Cymru Iach ar Waith, gan sicrhau ein bod yn darparu’r adnoddau, yr arweiniad a’r cymorth cywir i fusnesau fel eich un chi.
Diolch am eich amser!
Ymunwch â ni mewn digwyddiad bwrdd crwn iechyd a llesiant gweithwyr
Ydych chi’n uwch arweinydd sy’n gwneud penderfyniadau am iechyd a llesiant gweithwyr?
Ymunwch â ni, ynghyd â Chomisiwn Bevan a CBI Cymru i archwilio’r heriau a chyfleoedd sy’n gysylltiedig ag iechyd a llesiant gweithwyr.
Dyddiad: Dydd Llun, 7 Ebrill 2025
Amser: 9:30 AM – 1:15 PM
Lleoliad: Iechyd Cyhoeddus Cymru, Capital Quarter 2, Caerdydd
Nod y digwyddiad bwrdd crwn hwn yw dwyn ynghyd gynrychiolwyr busnes a rhanddeiliaid allweddol i archwilio’r heriau a’r cyfleoedd sy’n gysylltiedig ag iechyd a
llesiant gweithwyr.
Trwy greu llwyfan i rannu profiadau, atebion ymarferol, a strategaethau arloesol, bydd y digwyddiad yn ceisio adeiladu amgylchedd cydweithredol sy’n grymuso busnesau i wella iechyd a llesiant eu gweithlu.
Digwyddiad straen ac iechyd meddwl yn y gwaith
Y mis diwethaf buom yn cefnogi’r Awdurdod Gweithredol Iechyd a Diogelwch (HSE) i gyflwyno sesiwn ar-lein fel rhan o’i ymgyrch Working Minds (Saesneg yn unig).
Wedi’i hanelu at berchnogion a rheolwyr busnesau bach yng Nghymru, roedd y sesiwn yn ymdrin â sut i reoli straen yn y gweithle a hybu iechyd meddwl da i weithwyr.
Cafodd Oliver Williams, ein Hymgynghorydd Iechyd y Cyhoedd, gyfle i roi cyflwyniad yn ystod y sesiwn, gan rannu gwybodaeth am y cymorth sydd ar gael i gyflogwyr a busnesau gan Cymru Iach ar Waith.
Gallwch gael rhagor o wybodaeth am reoli straen yn y gweithle ar ein gwefan.
Cymru Iach ar Waith ar daith
Aeth Cymru Iach ar Waith i ddigwyddiad Hwb Cyflogaeth Conwy yn Llandudno yn ddiweddar: Iechyd meddwl a llesiant yn y gweithle.
Rhannodd Deanna, ein Cynghorydd Iechyd yn y Gweithle, y diweddariadau diweddaraf ar wasanaeth Cymru Iach ar Waith.
Roedd hyn yn cynnwys gwybodaeth am y wefan newydd sy’n cael ei datblygu, gweminarau sydd ar y gweill a llawer mwy.
Roedd gennym hefyd stondin yn y digwyddiad lle’r oedd modd i ni rwydweithio ag eraill a oedd yn bresennol a chofrestru pobl ar gyfer ein e-fwletin.
Aethom hefyd i ddau o ddigwyddiadau Siambrau Cymru fis diwethaf.
Roedd y digwyddiad rhwydwaith menywod yn gyfle gwych i rwydweithio ac ailgysylltu â
busnesau. Roedd yn wych clywed gan y siaradwyr Blessing Mutamba a Beth Baldwin, a rannodd eu syniadau, eu profiadau a’u gwaith dylanwadol.
Yn y digwyddiad iechyd dynion, roedd yn wych cael y cyfle i hyrwyddo trafodaethau am iechyd a llesiant dynion o fewn y gymuned fusnes Gymreig.
Rydym bob amser yn mwynhau cwrdd â’n rhanddeiliaid a byddwn yn mynd i ragor o
ddigwyddiadau trwy gydol y flwyddyn.
Dyddiadau allweddol
Diwrnod Dim Ysmygu (12 Mawrth)
Gall rhoi’r gorau i ysmygu fod y peth gorau i’ch iechyd. Mae llawer o fanteision hefyd i gael gweithlu di-fwg. Defnyddiwch Ddiwrnod Dim Ysmygu fel cyfle i annog eich gweithlu i roi’r gorau i ysmygu am byth! Ewch i Ash Cymru i gofrestru ar gyfer pecynnau cymorth.
Os oes gennych chi gyflogeion sydd eisiau rhoi’r gorau i ysmygu, cyfeiriwch nhw at Helpa Fi i Stopio, gwasanaeth rhoi’r gorau i ysmygu rhad ac am ddim GIG Cymru.
Diwrnod Cwsg y Byd (14 Mawrth)
Gwyddom fod cwsg yn dda i’n hiechyd. Gwyddom hefyd fod cael gweithlu iach yn beth da i fusnesau.
Thema Diwrnod Cwsg y Byd eleni yw ‘Rhowch Flaenoriaeth i Iechyd Cwsg’. Gallwch ddefnyddio hwn fel cyfle i amlygu pwysigrwydd cwsg ac annog gweithwyr i fabwysiadu ymddygiad cysgu iach.
Gallwch gofrestru i fod yn gynrychiolydd (Saesneg yn unig) neu gallwch gofrestru (Saesneg yn unig) i dderbyn diweddariadau, pecynnau cymorth a llawer mwy.
Diwrnod Ailgylchu Byd-eang (18 Mawrth)
Nod Diwrnod Ailgylchu Byd-eang 2025 yw cydnabod pobl, lleoedd, busnesau a gweithgareddau sydd wedi hyrwyddo ailgylchu. Gallwch helpu i nodi’r achlysur trwy hyrwyddo arferion gwyrdd ac ymgysylltu â chystadlaethau a gweithgareddau eraill trwy wefan Global Recycling Foundation (Saesneg yn unig).
Ewch i’n tudalen we Cynaliadwyedd Amgylcheddol i ddysgu am y pethau y gallwch eu gwneud i wneud eich gweithle yn fwy ecogyfeillgar.
Wythnos Dathlu Niwroamrywiaeth (17-23 Mawrth)
Gall gweithwyr â chyflwr niwrolegol fel Dyslecsia, Awtistiaeth neu ADHD gael effaith gadarnhaol ar eich gweithlu.
I nodi Wythnos Dathlu Niwroamrywiaeth, bydd amserlen o ddigwyddiadau rhad ac am ddim (Saesneg yn unig) ar gyfer yr wythnos a fydd yn cynnwys trafodaethau panel a siaradwyr ysbrydoledig o amrywiaeth o gefndiroedd a phroffesiynau.
Gallwch gofrestru (Saesneg yn unig) ar gyfer cymaint o ddigwyddiadau ag y dymunwch. Felly rhannwch hwn gyda’ch rhwydweithiau ac ymunwch â’ch gilydd i ddathlu gwahanol feddyliau!
Gallwch hefyd ymweld â’n tudalen we niwroamrywiaeth yn y gweithle i gael rhagor o wybodaeth.
Gellir cyrchu dolenni i ystod o ymgyrchoedd ymwybyddiaeth trwy wefan CIW.