Mai 2025

Croeso i gylchlythyr Cymru Iach ar Waith (CIW)

Mae ein cylchlythyr misol yn rhoi diweddariadau rheolaidd gan y tîm CIW. Mae’n cynnwys newyddion am iechyd a llesiant yn y gweithle a dolenni i ymgyrchoedd a digwyddiadau sydd ar ddod.

Y mis hwn:

• Gweminar Rheoli Absenoldeb Salwch i Gyflogwyr
• Arloeswr anweithgarwch economaidd yng Nghymru
• Sgrinio – Addysg a Hyfforddiant Cymunedol
• Dyddiadau ymgyrch ar gyfer mis Mehefin

Mae croeso i chi rannu ein cylchlythyr gyda’ch cydweithwyr neu rwydweithiau, ynghyd â’n manylion cofrestru a rhifynnau blaenorol.

Ymunwch â Gweminar CIW Am Ddim: Rheoli Absenoldeb Salwch (MSA) ar gyfer Cyflogwyr – Yn ôl oherwydd Galw Mawr!

Dydd Mercher 11 Mehefin 2025
Amser: 10:30 – 11:30
Platfform: Microsoft Teams

Yn dilyn diddordeb mawr a’r adborth cadarnhaol a gafwyd yn dilyn ein sesiwn flaenorol, mae Cymru Iach ar Waith yn falch o gynnig ail gyfle i ymuno â’n gweminar am ddim: Gweminar Rheoli Absenoldeb Salwch (MSA) i Gyflogwyr Wrth i anghenion gweithwyr esblygu a chostau sefydliadol barhau i godi, mae bod â strategaethau effeithiol ar gyfer rheoli absenoldeb oherwydd salwch yn bwysicach nag erioed.

Bydd y sesiwn ymarferol hon a gyflwynir gan Gynghorwyr CIW, yn rhoi cipolwg hanfodol i’ch helpu i wella llesiant yn y gweithle a lleihau absenoldeb.

Yr hyn y byddwch yn ei ddysgu:

• Tueddiadau o ran absenoldeb oherwydd salwch yng Nghymru a’r DU
• Sut mae cael gweithwyr i ymwneud â dulliau ataliol mewn perthynas ag iechyd
• Mewnwelediadau gan Cartrefi Melin (Hedyn) ar reoli absenoldeb salwch yn effeithiol
• Sut mae cael gafael ar adnoddau gan gynnwys pecyn e-ddysgu am ddim ar reoli absenoldeb oherwydd salwch.

Peidiwch â cholli’r cyfle hwn i gael mynediad at ganllawiau arbenigol ac offer ymarferol i gefnogi eich sefydliad—yn rhad ac am ddim.

Gallwch gymryd rhan am ddim.

Siaradwyr:

• Nikki Davies, Cynghorydd Iechyd yn y Gweithle
• Deanna Hughes, Cynghorydd Iechyd yn y Gweithle

Os oes gennych gwestiynau, cysylltwch â: [email protected].

Cofrestrwch erbyn dydd Mercher 4 Mehefin.

Arloeswr anweithgarwch economaidd yng Nghymru

Cyhoeddodd Jack Sargeant AS, Gweinidog Diwylliant, Sgiliau a Phartneriaeth Gymdeithasol ar 22 Ebrill 2025 y bydd £10 miliwn o gyllid Llywodraeth y DU yn cael ei ddefnyddio i gyflawni tri phrosiect peilot arloesol ym Mlaenau Gwent, Sir Ddinbych a Chastell-nedd Port Talbot yn 2025-26.

Bydd y cynlluniau peilot arloesol yn cefnogi dulliau lleol o leihau anweithgarwch economaidd i bobl sy’n anabl a/neu sydd â chyflyrau iechyd neu sy’n gofalu am eraill. Bydd ffocws penodol ar bobl sydd allan o waith ac nad ydynt ar hyn o bryd yn ymwneud â chyflogaeth, cymorth sgiliau, addysg na hyfforddiant.

Y nod yw gwneud y mwyaf o’r gefnogaeth bresennol sy’n seiliedig ar leoedd er mwyn lleihau anweithgarwch economaidd drwy ddod â gwasanaethau ynghyd a darparu taith ddi-dor i bobl leol sy’n hawdd ei llywio.

Bydd y cynlluniau’n profi dulliau arloesol newydd o nodi ac ymgysylltu ag unigolion sy’n economaidd anweithgar. Bydd hyn yn golygu gweithio gydag ystod eang o bartneriaid gan gynnwys Byrddau Iechyd Lleol, Meddygon Teulu, Canolfan Byd Gwaith, gofal cymdeithasol, gwasanaethau iechyd cymunedol a’r Trydydd Sector i lunio cynnig gwaith, iechyd a sgiliau lleol cryf a chydgysylltiedig i fynd i’r afael â bylchau ac anghenion lleol.

Am ragor o wybodaeth am gynigion Arloeswyr lleol cysylltwch â:

Blaenau Gwent – [email protected]

Ddinbych – [email protected] / [email protected]

Castell-nedd Port Talbot – [email protected]

Sgrinio – Addysg a Hyfforddiant Cymunedol

Mae Iechyd Cyhoeddus Cymru yn cynnig sesiynau ar-lein am ddim i hybu ymwybyddiaeth o raglenni sgrinio’r GIG yng Nghymru. Mae’r sesiynau wedi’u teilwra i’ch helpu i ddeall y manteision y gall y rhain eu cynnig i’ch gweithle a’r gymuned ehangach.

Archebwch eich lle heddiw er mwyn helpu i wella iechyd eich tîm ac annog llesiant!

Dyddiadau ymgyrch ar gyfer mis Mehefin

Wythnos Diabetes (9-15 Mehefin)

Mae Wythnos Diabetes, dan arweiniad Diabetes UK, yn gyfle allweddol i sefydliadau godi ymwybyddiaeth am ddiabetes a chefnogi llesiant gweithwyr. Fel cyflogwr, gallwch chwarae rhan bwysig wrth hyrwyddo dealltwriaeth, cynnig adnoddau ac annog arferion iach yn y gweithle.

Archwiliwch sut y gall eich sefydliad gymryd rhan yn Wythnos Diabetes – o gynnal sesiynau addysgol i rannu adnoddau sy’n cefnogi staff sy’n byw gyda diabetes neu mewn perygl o ddatblygu diabetes.

Wythnos Iechyd Dynion (9-16 Mehefin)

Mae’r Wythnos Iechyd Dynion hon, a drefnir gan Fforwm Iechyd Dynion, yn canolbwyntio ar yr angen am Strategaeth Iechyd Dynion genedlaethol a’r camau sydd eu hangen i’w chyflawni. Gall cyflogwyr ddefnyddio’r wythnos hon i roi sylw i iechyd dynion yn y gweithle, annog sgyrsiau agored a rhannu adnoddau.

Darganfyddwch sut y gall eich gweithle gymryd rhan yn Wythnos Iechyd Dynion.

Diwrnod Aer Glân (19 Mehefin)

Dysgwch am bwysigrwydd mynd i’r afael â llygredd aer yn y gweithle, ffyrdd o gefnogi Diwrnod Aer Glân Cenedlaethol a sut mae creu amgylchedd glanach ac iachach i weithwyr.

Gall cyflogwyr gymryd camau syml ac effeithiol i leihau llygredd aer ac ymgysylltu staff mewn mentrau aer glân.

Dyma rai ffyrdd o gynnwys eich gweithle:

• Cynnal digwyddiad
• Rhannu gwybodaeth ac adnoddau
• Dathlu llwyddiant

Dysgwch ragor am sut y gall eich gweithle gefnogi Diwrnod Aer Glân.

Gellir gweld gwybodaeth ac adnoddau am ystod o ymgyrchoedd ymwybyddiaeth iechyd a llesiant ar ein gwefan.