Ymgysylltu â natur

Rhowch wybod i weithwyr ei bod hi’n iawn cymryd seibiannau neu gynnal cyfarfodydd wrth gerdded yn yr awyr agored. Awgrymwch y gallent fynd am dro byr, eistedd mewn man gwyrdd, neu gymryd eiliad i sylwi ar y byd naturiol o’u cwmpas. Gallech hefyd gefnogi staff i gymryd rhan mewn prosiectau cadwraeth lleol drwy gynnal diwrnodau gwirfoddoli corfforaethol.

Helpwch staff i ddod o hyd i deithiau cerdded natur gerllaw. Os nad oes rhai yn yr ardal leol, edrychwch ar greu llwybrau cerdded diogel neu wella mynediad at fannau gwyrdd ger eich gweithle.

Ceisiwch gadw planhigion, blodau a mannau â glaswellt go iawn o amgylch yr adeilad. Osgowch dorri’r glaswellt yn rhy aml a dewch â rhywfaint o wyrddni i mewn hefyd – gall planhigion fywiogi unrhyw le a gwella ansawdd yr aer yn y gwaith. Ceisiwch gynnwys staff mewn diwrnodau plannu a chreu cynefinoedd. Mae grantiau ar gael yng Nghymru ar gyfer creu mannau ar gyfer natur.

Gwnewch yn siŵr bod eich cynlluniau llesiant yn y gweithle yn sôn am fanteision natur. Gall natur helpu i leihau straen, gwella hwyliau a chefnogi iechyd meddwl.

Gwnewch fwy o gysylltiadau â natur yn eich gweithle gyda chanllawiau o’r Nature Connected Organisations Handbook, o Brifysgol Derby. Gallwch hefyd ddathlu digwyddiadau fel Diwrnod y Ddaear neu Wythnos Natur Cymru, a defnyddio rhwydweithiau gwirfoddolwyr lleol a phrosiectau a ariennir gan grantiau i helpu i gyflwyno gweithgareddau sy’n seiliedig ar natur.

Gall hyrwyddo teithio llesol ar gyfer cymudo i’r gwaith ac yn ôl, neu ar gyfer mynd i gyfarfodydd oddi ar y safle, greu cyfleoedd i weithwyr dreulio amser mewn mannau gwyrdd a bod yn egnïol hefyd.

Yng Nghymru mae sefydliadau a all eich helpu chi a’ch gweithwyr i gysylltu â natur. Cysylltwch â nhw i gael rhagor o wybodaeth am sut y gallech chi gymryd rhan yn eich ardal leol:

• Mae Partneriaethau Natur Lleol Cymru yn gweithio i amddiffyn ac adfer natur ledled Cymru.
• Mae Partneriaeth Bioamrywiaeth Cymru yn dwyn ynghyd chwaraewyr allweddol o’r sectorau cyhoeddus, preifat a gwirfoddol i hyrwyddo a monitro bioamrywiaeth a gweithredu ar ecosystemau yng Nghymru.
• Mae Presgripsiynau Natur yr RSPB yn ffordd greadigol i weithwyr iechyd a gweithwyr proffesiynol cysylltiedig siarad â phobl am natur. Y syniad yw helpu pobl i deimlo’n well trwy dreulio mwy o amser yn yr awyr agored a chysylltu â’r byd naturiol. Mae presgripsiynu cymdeithasol yn tyfu yng Nghymru.
• Edrychwch ar grantiau ac adnoddau am ddim ar gyfer creu cynefinoedd a phlannu coed.
• Mae Hapus yn lle sy’n ymroddedig i les meddyliol. Natur yw un o’u llwybrau tuag at lesiant meddyliol.

Gallwch hefyd gofrestru ar gyfer cylchlythyr Cymru Iach ar Waith i gael yr wybodaeth ddiweddaraf am awgrymiadau a chymorth.